الغواني باب داري اليوم دقّو
ولحاظ سهام بالدلّال دقّو
عن الأوصاف ياخلّان دقو
وفيهم حار عجما والعرب
على بابي الغويدا اليوم دقّت
وسهام رموشها بالقلب دقّت
عن الأوصاف بالأفهام دقّت
ربيبة حسن أمّات النقاب
على حالي الغويدا اليوم رقّت
ورفعتني إلى العلياء رقّت
يحاكي عطرها الفوّاح رقّت ـة
عبير الند كالغيث انسكب
مرار الصبر عالهجران دقتو
مابعرف ياربع شو مدى دقتو
حلا لي من الولف عالباب دقتو
وقلبي دق برجوع الطياب
كفى هجران والمحبوب تقلو
وعلى جمر اللظى هالقلب تقلو
بعادك ياولف كالتل تقلو
وهمّي إن وقع عالجبل داب
♥♥♥
ياهموم عنّا ترحّلي ياهموم
مهموم قاسيت الأسى مغموم
من يوم هالخلّان ماغابوا
واقع بحسرة والقلب مغتوم
واقع بحسرة والقلب مجروح
وبالسر ماممكن بعمري بوح
والناس دمعي اللي جرى عابوا
لا م بيعرفوني بنوب شو مكلوم
دمعي عخدي شاكل النجمات
شلال دمعي شكّل البحرات
وزفرات حرّه بالقلب دابو
وماعاد جتني من وليفي علوم
ضهري انحنى وعالأرض عودي مال
ومن قبلها شو كنت عال العال
يخرب فنارو الدهر شو صابو
مرّه معي ومرّات قتلي يروم
عفراق ولفي هالقلب حيران
قاعد لوحدي من الطفر ضجران
يادل دلّي مفارق حبابوا
نوم السعادة والهنا محروم
مفارق حبيبي ياضيا هالعين
عامات أو زاد العقد سنتين
وأخبار عنّو بنوب ماجابو
وماظن شوفو للقيامة تقوم