وزعى النظرات
""""""""""""""""""""
يا واحة فى العينين
يا ساكنة ود العين
يا الساحرة كالأبنوس
ديل عيون خلقة
ولا مطلية بالفيروز ؟
إنت فيك عيون باهرة رواحة
غريرة النظرات لاهية منداحة
تفرح المحزون تحزن الشافة
توزع النظرات تنور الباحة
تصور المكنون تمنتج رؤاها
إنت فيك عيون بريئة لماحة
تهلك اللماح ترمى برماحة
تسرى جوة الجوف
تخوف الشافة
توهج الألوان
زى البرق خاطفة
فيك عيون عصية أوصافة
تبهرج الأفكار جافلة خوافة
تموسق النظرات تغض اطرافة
تشبه الأبنوس
وعظمة الفردوس
شبيهة قوس قزح
فى القوس
زى عيون الريم
تتلاصف وتكوس
مرة ترعى
ومرة تتبين المدسوس
فيك عيون حجى الخرافات
تنوم تباريح الحنين
تهدرج النظرات
تتشابى فوق للحس
ترقرق الدمعات
تهضرب لسان الحال
تتوه الكلمات
ديل عيون خلقة
ولا مسكونة بالآيات ؟
""""""""""""""""
الصادق عبدالمولي